جريدة المزرعة عيون الواقع وحلم المستقبل
إنتهى مقال الاسبوع الماضي على إننا إزاى نفرق بين نقص العناصر والاصابة المرضية والحشرية وظروف الاجهاد الملوحة والعطش.
اولا بخصوص نقص العناصر مهم نعرف ان فيه ٥ عناصر ها نلاقي أعراض نقصهم فى الورق القديم وهم النيتروجين والفوسفور والبوتاسيوم والماغنسيوم والكبريت..
اولا : الكبريت غالبآ مش هاتلاقي اعراض نقص ليه فى معظم المزارع لأنك فى الخدمة بتحط كبريت زراعى وبتسمد كبريتات نشادر وكبريتات بوتاسيوم..
البوتاسيوم غالبا ها تلاقى إصفرار فى الورق القديم مع إحتراق لأطراف الورق القديم ويزيد الاحتراق بزيادة نقص العنصر ..
الفسفور غالبآ بيبقى مصحوب بظهور اللون الأحمر للورقة وأحيانا اللون الأصفر زيه زى نقص النيتروجين طيب أفرق بينهم ازاى ؟؟
هز فرع الشجرة لو الورق سقط ده غالبآ نقص فوسفور لو فضل ماسك فى الفرع ده نقص نيتروجين..
أما الماغنسيوم ها تلاقى بدايه اصفرار فى الورقة وبزيادة النقص هتلاقى الورقة بدأت تأخد اللون الأبيض عشان الماغنسيوم مسئول عن تركيب جزى الكلورفيل اللى بيدى اللون الأخضر للورقة.
ثانيآ بص على الورق الجديد اعراض نقص الحديد والزنك والمنجنيز والبورون والنحاس والمولبيدنم من العناصر الصغرى ومعاهم الكالسيوم من العناصر المتوسطة ها تلاقيهم فى المكان ده .
أول حاجة تبص عليها البرعم الطرفى حى والا ميت.. بعد كده دور على الفرق بين العناصر الصغرى..
المولبيدنم بلاش تدور عليه لأنه العنصر الوحيد اللى بيزيد إمتصاصه تحت ظروف الاراضى القلوية عالية الPH وهى دى طبيعة الأراضي عندنا .
الزنك ها تلاقى الورق الجديد مكبس مع بعضه زى الوردة والمسافة ضيقة جدآ بين السلاميات.
الحديد ها تلاقى الورق الجديد اصفر وعروق الورقة خضرا زى البرسيم.
المنجنيز ها تلاقى الورق الجديد فيه زى ورقة الدورانتا المبرقشة .
البورون ها تلاقى البرعم الطرفى ميت والورق اصفر والورقة مقلوبة زى شكل الفنجان.
النحاس موت للبرعم الطرفى والورقة صغيرة وصفرا.
الكالسيوم موت للبرعم الطرفى والورقة مقلوبة لتحت والبرعم الطرفى ميت (عكس البورون).
وعموما عشان ما حدش يتوه فيه رسم توضيحى تصميم المادة العلمية للرائع د أحمد صبرى بكل أعراض نقص العناصر ومكان التواجد وده ها يسهل عليك فهم الموضوع..
ياريت بعد ما تقرأ البوست إنزل المزرعة وحاول تطبق اللى مكتوب ومرة بعد التانية ها تلاقى نفسك بتعرف نقص العنصر اللى عندك وانت بتلف فى المزرعة بعينك على المشايات ..
أنا حبيت أركز على الموضوع ده لإن لو ما تعرفش نقص العناصر يبقى هاتعمل برنامج تسميد إزاى ولو عرفته ها توفر لصاحب المزرعه فلوس كتير ونصيحة خالصة لله الإستشاري الشاطر زى الطبيب الشاطر اللى الروشة بتاعته فيها العلاج المطلوب بس مش مليانة أدوية فيها حاجة ها تنفع والباقى ممكن يضر ويخسر فلوس.
وعشان البوست طويل المرة دى إن شاءالله المقال اللى جاى ها نقول يعنى إيه تكنيك الكيس والقطنة اللى أقدر بيه أفرق بين الإصابات الحشرية والفطرية والفيروسية ونقص العناصر لو حصل عندى مشكلة فى زرعى ومش عارف أفرق بينهم..
وحتى موعد المقال القادم بإذنه تعالى…
السلام ختام..
