السلام ختام

أ.د محمد محمود

□فى ظل المتغيرات العنيفة التى أصبحت تحيط بالزراعة حاليآ من كل جانب واثرت بشدة على الإنتاجية وصافي الربح للمزارع والمستثمر أصبح السؤال.. ازاى اقدر أحقق المعادلة الصعبة (اتعامل ازاى مع المرحلة دى وأخرج ازاى منها سليم) والمقصود بكلمة سليم هنا يعنى بدون خسائر ..
□مزارع الفاكهة أصبح الان على حد السيف لايقدر يوقف صرف على زرعه ولا يقدر يكلف زرعه زى ما كان بيعمل فى السنين اللى فاتت ..ارتفاع أسعار اسمدة ومبيدات ومنظمات نمو وكهربا للمزرعة وسولار لمواتير الرش واجور عمالة وعبوات للمحصول وأسعار نقل للمحصول للأسواق وظروف مناخية متغيرة فى اليوم الواحد خلت المزارع او الاستشاري واقف قدام المحصول اللى عارفه زى كف ايده محتار بيتعلم منه من اول وجديد ..
□مزارع الفاكهة تحديدا هو الأكثر تضررا لان زرعته ثابتة ميقدرش يغيرها إلا لو قلعها واقلع عين المزارع ولاتقرب من شجرة غرسها وصرف عليها دم قلبه..
طب ايه الحل ..
اولا فيه 7محاور لازم التركيز عليها كأساس للتعامل معاها ولعدم الخسارة اخر الموسم وكلها تحت عنوان واحد (الجودة) ايه هى ال 7محاور..
١) سلامة شبكة الرى لان دى هى اساس ريك وتسميدك ولو فيه مشكلة فيها هيبقى فيه فقد فى كفاءة كل عملياتك الزراعية ومش هاتحقق الجودة اللى مستنيها.
٢) سلامة مواتير رشك وتفهم طبيعة ونوع السماد والمبيد او منظم النمو اللى بتستخدمه (التوقيت والطريقة والميعاد ومرحلة نمو النبات بتاعك وسرعة جرارك واتجاه البشاير لان دى برضه هتأثر على جودة المنتج النهائى) .
٣) سلامة مصادر تسميدك ومبيداتك واى منظم نمو بترش بيه ..اوعى تعمل ناصح على الشجرة..اختار المنتج المحترم ولو غالى لان فيه تكنولوجيا هتاخد قدامها جودة وهاتحافظ على شجرتك تكمل معاك سنين كتيرة ولأن أجدادنا قالوا الغالى رخيص..
٤)قلل فاقد مزرعتك وده بيحدده عوامل كتيرة..تحديد ميعاد الجمع الصح وبطريقة جمع صح وعبوة سليمة وتشوين صح للمحصول بعد جمعه لاننا شفنا عمالة التعبئه تبقى قاعدة تحت الخُص فى الضل بتعبى صح وبعدين الكراتين والبرانيك تتحط تحت الشمس الحاميه بره الخُص وده أكبر عامل يدمر جودة محصولك لان تدهور الثمار بيبقى سريع جدآ ويزود الفاقد ويروح الوكالة سايح يقلل سعر بيعه..
٥) لو عندك حوشة او اكتر لمحصول عندك خوخ عنب او اى محصول تانى فيها مشاكل وعالجت فيها كتير و الإنتاجية أقل من باقي الارض قلعها فورآ لانها فى النهاية جودة محصولها أقل وسعرها أقل وتكاليفها اعلى وده بيقلل من الربح النهائى للمزرعة وخد بالك انت كده وفرت خدمتها فى كل حاجة (رى وتسميد وعمالة ومكافحة) وركزت شغلك على الباقى وزودت ربحية الحوش التانية بزيادة التركيز عليها .
٦) دور للحكومة لازم تزود شغلها عليه الرقابة عشان تقفل أبواب المركبات الشمال اللى الشغل بيها بيقلل الجودة غير المصايب الصحيةاللى بيجيبها والنقطة دى تحديدا عاوزة سياف يقطع الرقاب.. عاوزة مشاركة من الكل مستهلك وحكومة لان كلنا فى نفس المركب بالإضافة لضرورة حث المكاتب التجارية بالسفارات على زيادة جهدها فى فتح اسواق جديدة للتصدير وده الامل فى ان الناس دى تكمل بس لازم برضه هنا بنأكد على ضرورة الجودة للى بنصدره وياريت نبطل فهلوة مع اللى بنصدر ليهم زى ما بعض المصدرين بيعملوا وبيوقعوا الدنيا ويتسببوا فى خساير للى بيلتزم ولو حتى فى سمعته وسمعه المنتج المصرى .
٧) دور الشركات اللى لازم تساعد دلوقتى تيجى على نفسها وتقلل هامش ربحها ولو لفترة قصيرة عشان العجلة تمشى لانها لو وقفت من عند المزارع الباقى كله ها يرقد وراها .

□انا حددت مزارع الفاكهةوالكلام برضه للمزارع الخضر والمحاصيل بس لان مزارع الخضر او المحاصيل ممكن يريح موسم او يزرع نص أرضه او يغير محصول لكن مزارع الفاكهة فعلا بين دفتى المطرقة والسندان .مطرقة التكاليف وسندان اسعار البيع..
اللهم موسم خير وبركة.. والسلام ختام..